बहिणीचे स्टेटस ठेवल्याने तरुणाला बेदम मारहाण; मंद्रूप पोलीस ठाण्यात चौघांविरुद्ध गुन्हा दाखल.
मंद्रूप पोलीस ठाण्यात चौघांविरुद्ध गुन्हा दाखल.
मंद्रूप – प्रतिनिधी – राहुल उडाणशिव ( द.लोकतंत्र नेशन नेटवर्क )
सोशल मीडियावर बहिणीचे स्टेटस का ठेवले, या कारणावरून झालेल्या वादातून एका २० वर्षीय तरुणाला जबरदस्तीने शेतात नेऊन कोयत्याने जीवे मारण्याचा प्रयत्न केल्याची खळबळजनक घटना माळकवठा (ता. दक्षिण सोलापूर) येथे घडली आहे. याप्रकरणी मंद्रूप पोलीस ठाण्यात चार जणांविरुद्ध भारतीय न्याय संहितेच्या (BNS) विविध कलमान्वये गुन्हा दाखल करण्यात आला आहे.
फिर्यादी मादण्णा बिळेनसिद्ध वडेयार (वय २०, रा. आरकेरी, जि. विजापूर, कर्नाटक) याने दिलेल्या तक्रारीनुसार, ही घटना २३ मार्च २०२६ रोजी दुपारी ३:४५ च्या सुमारास घडली. फिर्यादीने आरोपी सतीश थोरात याच्या बहिणीचे स्टेटस ठेवले होते, याचा राग आरोपीच्या मनात होता.
घटनेच्या दिवशी आरोपी प्रकाश सुसलादी, सिद्राम बिरादार आणि गेनसिद्ध वडेयार यांनी संगणमत करून फिर्यादीला, त्याने विरोध दर्शवला असतानाही जबरदस्तीने माळकवठा येथील सतीश थोरात याच्या शेतात नेले. तिथे सतीश थोरात याने “माझ्या बहिणीचे स्टेटस का ठेवले?” असे म्हणत शिवीगाळ करण्यास सुरुवात केली. वादाचे रूपांतर हाणामारीत झाले आणि सतीशने आपल्या हातातील कोयत्याने फिर्यादीवर हल्ला केला.
’याला जिवंत सोडू नका’ म्हणत दिली चिथावणी
मारहाण सुरू असताना तिथे उपस्थित असलेले आरोपी प्रकाश सुसलादी आणि सिद्राम बिरादार हे “याला मार, याला जिवंत ठेवू नका” असे म्हणत मोठ्याने ओरडून आरोपीला चिथावणी देत होते. या हल्ल्यात मादण्णा हा गंभीर जखमी होऊन बेशुद्ध पडला. सोबत असलेला मित्र गेनसिद्ध वडेयार हा घाबरून शेताच्या बांधावर जाऊन थांबला होता.
मंद्रूप पोलिसांत गुन्हा दाखल
याप्रकरणी मंद्रूप पोलिसांनी सतीश हनुमंत थोरात उर्फ पिंटू (रा. माळकवठा), सिद्राम बिळनसिद्ध बिरादार, प्रकाश महेश सुसलादी (दोघे रा. सुसलादी, कर्नाटक) आणि एक २५ वर्षीय अनोळखी तरुण (सतीशचा मित्र) अशा चौघांविरुद्ध गु.र.नं. ८६/२०२६ नुसार गुन्हा दाखल केला आहे. यामध्ये आत्महत्येस प्रवृत्त करण्याचा प्रयत्न (कलम १०९), बेकायदेशीर डांबून ठेवणे (१२७), अपहरण (१४०), फौजदारी धमकी (३५१) आणि शांतता भंग करण्याच्या उद्देशाने अपमान (३५२) यांसारखी गंभीर कलमे लावण्यात आली आहेत.
सदर प्रकरणाचा पुढील तपास पोलीस उपनिरीक्षक (PSI) डांगे हे करत असून, अद्याप आरोपींना अटक झालेली नाही.
